Daşkənd “Böyük Dəbilqə”sində möhtəşəm qələbə

Azərbaycan cüdoçuları Özbəkistanın paytaxtında keçirilən bu ilki növbəti “Böyük Dəbilqə” turnirində də böüyk uğur qazandılar. Bundan bir ay əvvəlki Paris turnirindəki nailiyyət artıqlaması ilə təkrar olundu. Azərbaycan cüdoçuları dünya arenasında istənilən ölkənin idmançıları ilə rəqabət aparmağa və hətta, onların ən yüksək titullularına qalib gəlməyə qadirdilər. Daşkənddə bu, bir daha sübut olundu.

Özümüzünküdür, yəni “Judo club 2012”nin nümayəndəsidir deyə önə çəkmirəm, elə təkcə Murad Fətiyevin (-90 kq) finalda gürcüstanlı ikiqat Olimpiya çempionu Laşa Bekauriyə qalib gəlməsi və qızıl medal qazanması Azərbaycan cüdosu üçün böyük nailiyyətdir. Murad çox əzmkar və güclü idmançıdır, son vaxtlar yığma komandada öz layiqli yerini tutub. Ümidlərimizi bundan sonrakı beynəlxalq yarışlarda da doğruldacağına inanıram.

Milli komandanın digər üzvlərinin – Əhməd Yusifovun (-60 kq) və Ömər Rəcəblinin (-81 kq), Kənan Nəsibovun (+100 kq) qızıl, Balabəy Ağayevin (-60 kq) gümüş, Zelim Kotsoyevin (-100 kq) və Camal Qamzatxanovun (+100 kq) bürünc medal qazanmaları Azırbaycanda cüdonun davamlı inkişafda olduğunun bariz göstəricisidir.

Daşkəndə 8 idmançı ilə yollanan milli komandamızın mötəbər yarışı 39 ölkə arasında 4 qızıl, 1 gümüş və 2 bürünc medalla başa vuraraq komanda hesabında cüdonun yaradıcısı olan Yaponiyadan sonra ikinci, kişilərin mübarizəsində isə birinci yeri tutması cüdo salnaməmizin parlaq səhifələrindən biri kimi daim xatırlanacaq.

Azərbaycan cüdosunun bugünkü uğurları dövlətimizin idmana göstərdiyi diqqət və qayğının, Azərbaycan Cüdo Federasiyasında aparılan sistemli işin və məşqçilərin fədakar əməyinin nəticəsidir. Bu uğurlar, eyni zamanda, gənclərin idmana marağını artırır, onları sağlam həyat tərzinə və qələbələrə ruhlandırır.

İnanıram ki, cüdoçularımız bundan sonra da dünya arenalarında uğurla çıxış edəcək, Azərbaycan bayrağını yüksəklərə qaldıracaq və cüdo məktəbimizin şöhrətini daha da artıracaqlar. Daşkənddə qazanılan möhtəşəm zəfər bunu söyləməyə əsas verir. Bu uğurda zəhməti olan idmançılarımızı, onların məşqçilərini, federasiya rəhbərliyini və Azərbaycan cüdo ailəsini ürəkdən təbrik edirəm!

Azər Əsgərov