Şəhidlərin xatirəsi hər zaman bizimlədir!

27 sentyabr 2020-ci il müstəqil Azərbaycan Respublikası üçün şərəfli tarixdir. İşğalçı Ermənistanın növbəti hərbi təxribatına cavab olaraq Ali Baş Komandan qəhrəman Ordumuza əks-həmlə əməliyyatına başlamaq əmri verdi.

Hər bir silahlı toqquşma ölüm-itim, qan-qada, ağrı-acı deməkdir. Amma torpaqları düşmən tapdağında olan xalqımız bu qərarı, mən deyərdim, sevinclə qarşıladı. Vətənpərvər gənclərimiz hərbi səfərbərlik idarələrinin qarşısına axın etdilər. Əli silah tutan yaşlı-cavan hamı ordu sıralarına qoşulmağa, müqəddəs savaşda iştirak etməyə can atırdı.

Biz bu savaşda – 44 günlük Vətən müharibəsində Qələbə qazandıq: möhtərəm Prezident, Müzəffər Ali Baş Komandan İlham Əliyevin müdrik və qətiyyətli hərbi-siyasi, diplomatik addımları, xalqımızın birliyi, ordumuzun qüdrəti,  şəhidlərimizin, qazilərimizin, qəhrəman hərbçilərimizin misilisiz hünəri, sayəsində Zəfər bizim oldu!

İndi 27 sentyabr – Vətən müharibəsində həyatını itirən şəhidlərimizin xatirəsini Anım Günüdür.

Onlara Allahdan rəhmət, ailələrinə səbr diləyirəm!

Yaşasın Azərbaycan!

Azər Əsgərov