2026-cı il: Zəfər, quruculuq və əbədi həmrəylik

Cüdoda belə bir qızıl qayda var: yıxılmaq qəbahət deyil, ayağa qalxmamaq məğlubiyyətdir. Biz millət olaraq, möhtərəm Prezident, Müzəffər Ali Baş Komandan cənab İlham Əliyevin  rəhbərliyi ilə ayağa qalxmağın, birliyin və böyük Zəfərin ən möhtəşəm nümunəsini bütün dünyaya nümayiş etdirdik.

Bu gün biz iki əlamətdar bayramın – 31 Dekabr Dünya Azərbaycanlılarının Həmrəyliyi Günü və Yeni ilin astanasındayıq. Həmrəylik bizim üçün sadəcə bir təqvim günü deyil; o, həm mübarizə meydanlarında bizi qalib edən ruh, həm də geniş quruculuq prosesində böyük layihələri gerçəkləşdirən sarsılmaz gücdür. Bu birlik sayəsində biz bu gün Böyük Qayıdışın qürurunu yaşayırıq. İşğaldan azad edilmiş torpaqlarımızın hər qarışında bərqərar olan əbədi sülh regionumuzun tərəqqisi və çiçəklənməsi üçün açılan ən böyük qapıdır.

Qarşıdan gələn 2026-cı ili mən Azərbaycanın həm fiziki, həm də mənəvi yüksəlişinin yeni zirvəsi kimi görürəm. Cənab Prezidentin bu ili ölkəmizdə Şəhərsalma və Memarlıq İli elan etməsi biz iş adamları və inşaatçılar üçün xüsusi bir məsuliyyətdir. Daşı daş üstünə qoyaraq ucaltdığımız hər bir bina, Qarabağda və Şərqi Zəngəzurda bərpa etdiyimiz hər bir şəhər bizim Azərbaycanın bu gününə və gələcəyinə töhfədir.

Eyni zamanda, 2026-cı ildə Azərbaycanın Dünyanın İdman Paytaxtı statusunu daşıması bir veteran idmançı kimi qəlbimi qürurla doldurur. İdmanın birləşdirici gücü və sülhün gətirdiyi sabitlik ölkəmizi regionun sarsılmaz liderinə çevirir.

Bu bayram günlərində, dünyanın harasında yaşamasından asılı olmayaraq, qəlbi Azərbaycanla döyünən hər bir soydaşımızı ürəkdən təbrik edirəm. 2026-cı il Azərbaycanın intibahının, yeni memarlıq incilərinin, idman zəfərlərinin və daha da sıx həmrəyliyimizin ili olsun.

Bayramlarınız mübarək! Yolumuz hər zaman sülh və zəfərlə dolu olsun!

Azər Əsgərov