Əziz həmvətənlər!

Dünən Zəfər bayramını qeyd etdik. Bu gün isə Dövlət Bayrağı Gününüdür.

Möhtərəm Prezident, Müzəffər Ali Baş Komandan cənab İlham Əliyev dünən Qarabağda, Xankəndi şəhərində Vətən müharibəsində möhtəşəm Zəfərimizin 3-cü ildönümünə həsr olunmuş hərbi paradı qəbul etdi. Silahlı Qüvvələrimizin rəşadətli hərbçilərinin qürurlu, mətin addımlarının sədası Xankəndidən bütün dünyaya yayıldı. Bu anlarda bizim – hər bir azərbaycanlının qəlbi hədsiz fərəh hissi ilə döyünürdü.

Yaşasın, Zəfərimiz! Yaşasın, qələbələrimizin memarı Müzəffər Ali Baş Komandan!

Torpaqlarımızın azadlığı, dövlət suverenliyimizin bərpası uğrunda canından keçən şəhidlərimizə Allahdan rəhmət, qazilərimizə şəfa, Vətənimizin və Bayrağımızın keşiyində dayanan əsgər və zabitlərimizə möhkəm cansağlığı arzulayıram!

Bayraq millətimizin, dövlətimizin şərəf və ləyaqətinin ifadəsi, həm də şəhidlərimizin, Vətən uğrunda gözünü qırpmadan canından keçənlərin nişanəsidir.

Bu gün bütün ərazilərimizdə üçrəngli bayrağımız dalğalanır. Artıq üçüncü ildir ki, Dövlət Bayrağı Günü işğaldan azad edilən Azərbaycan torpaqlarında da qeyd olunur.

Hər zaman yüksəklərdə dalğalan, Azərbaycan Bayrağı!

Azər Əsgərov

Azərbaycanın cüdo veteranlarından ibarət yığma komandanın tərkibində Əbu-Dabidə usta cüdoçular arasında dünya çempionatında iştirakım idman həyatımdakı ən mühüm hadisələrdən biri kimi həmişəlik yaddaşımda qalacaq.

İstənilən yarış, ilk növbədə, ciddi sınaqdır: hazırlıq mərhələsini necə keçməyinin, iradəni və mübarizə aparmaq qabiliyyətini necə nümayiş etdirə bilməyinin sınağıdır. Etiraf edim ki, Ulu Öndərin 100 illik yubileyi ilə əlaqədar ölkəmizdə Heydər Əliyev İli elan edilmiş 2023-cü ildə keçirilən turnirdə uğurla çıxış etmək mənim üçün çox vacib idi. Pandemiya və 2020-ci il Vətən Müharibəsindən sonra dədə-baba torpaqlarımızın işğaldan azad edilməsi istiqamətində aparılan uğurlu hərbi əməliyyatlardan, Azərbaycan bayrağının yenidən Xankəndi üzərində dalğalanması ilə başa çatan local antiterror tədbirlərindən sonra Əbu-Dabidə keçirilən yarış mənim üçün ilk ciddi turnir və sınaq idi.

Çempion olmağı, cəmiyyətimizdə hökm sürən qalibiyyət ruhunu dəstəkləməyi çox istəyirdim. Dünya çempionu olmağı bacardığım üçün çox sevincli və qürurluyam. Fəxri kürsüdə dayananda və bütün zal Azərbaycanın himnini dinləyib, ölkənin qürurla yüksələn bayrağına baxanda özümü kövrəlməkdən çətinliklə saxlaya bildim.  Bax, buna görə Birləşmiş Ərəb Əmirliklərinin paytaxtında keçirilən dünya çempionatının qızıl medalı mənim üçün həmişə xüsusilə əziz olacaq.

Xankəndidə və Qarabağın digər şəhərlərində Dövlət bayrağımızın qaldırıldığı bir vaxtda Azərbaycan idmanının qələbəsi şərəfinə də bayrağımızın ucaldılması mənim üçün çox önəmli idi. Çox şadam ki, artıq çempionatın ilk günündə, qarşıdakı Qələbə Günü və Dövlət Bayrağı Günü ərəfəsində ölkəmizin qalibiyyətli ruhuna öz töhfəmi verə bildim.

Mükafatlandırma mərasimində Azərbaycan cüdoçularının qələbəsi şərəfinə Azərbaycan bayrağının ucaldılması və Dövlət himnimizin səsləndirilməsi məndə sevimli ölkəmlə bağlı hədsiz qürur hissi yaratdı. Azərbaycan Prezidenti, Müzəffər Ali Baş Komandan İlham Əliyevin komandanlığı ilə Qarabağda döyüş meydanlarında Qələbə qazanan Azərbaycan Ordusunun əsgərlərinə sonsuz minnətdarlıq hissi duyaraq biz qalib xalqın və qalib dövlətin nümayəndələri kimi özümüzü çox xoşbəxt hiss etdik.

Azər Əsgərov

“20 il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır”.

Bunu Prezident İlham Əliyev oktyabrın 15-də Xankəndi şəhərində Azərbaycan Respublikasının Dövlət bayrağının qaldırılmasından sonra çıxışı zamanı deyib.

İlham Əliyevin bu sözləri möhtərəm liderimizin ümumxalq səsverməsi ilə Azərbaycan Prezidenti seçildiyi 2003-cü ilin 15 oktyabrını xatırladaraq, parlaq bir günəş şüası kimi ürəyimə yayıldı! Torpaqlarımızda öz tarixi miqyasına görə nə qədər müxtəlif əhəmiyyət kəsb edən hadisələrin baş verdiyini hər bir Azərbaycan vətəndaşı bilir.

Və hər birimiz, əminəm ki, əziz Vətənimizin Prezidentinin ömrünün 20 ilini xalqına verdiyi vədin yerinə yetirilməsinə – Azərbaycanın ərazi bütövlüyünün bərpasına, Qarabağ torpağının işğaldan azad olunmasına, ölkənin yüksək beynəlxalq standartlara cavab verən sosial-iqtisadi inkişafının təmin edilməsinə həsr etmiş İlham Əliyevin olmasının böyük əhəmiyyətini dərk edirik.

İlham Əliyevin Xankəndində Qələbə bayrağını ucaltmaqla çoxəsrlik münaqişə tarixinə məntiqi son qoydu və əsl həqiqət zəfər çaldı. 2023-cü il oktyabrın 15-i Azərbaycan tarixinə əbədi həkk olundu və bütün dünyaya sübut etdi ki,  “Qarabağ Azərbaycandır!”

Sizinlə fəxr edirik, cənab Prezident!

Azər Əsgərov

Maksim Şevçenkonun Azərbaycanda heç bir əlavə təqdimata ehtiyacı yoxdur. Əminliklə deyərdum ki, onu, az qala, hər evdə tanıyırlar… Maksimin Ermənistan-Azərbaycan münaqişəsi məsələsində inadkarlığı və qorxmazlığı, ermənilərin və onların himayədarlarının çoxsaylı təhdidlərinə baxmayaraq, obyektiv mövqe tutması heyranlıq doğurur. Münaqişənin tarixini dərindən bilməsi, eləcə də erməni saxtakarlıqlarını ifşa etməsi onu təkcə Azərbaycanda deyil, dünyanın müxtəlif yerlərində fikirləri diqqət cəlb edən ekspertə çevirib.

Məhz buna görə də onun Bakıya gəlişi, “Heydər Camalın ömür yolu” mövzusunda ictimaiyyətlə görüşü, həmyerlimizin kitablarının təqdimatı böyük marağa səbəb olub. İki gün ərzində, oktyabrın 6-sı və 7-si Bakıda Beynəlxalq Muğam Mərkəzi çox əlamətdar hadisənin – tanınmış rusiyalı politoloq və jurnalist Maksim Şevçenko ilə görüşün şahidi oldu.

Gecə Maksimin görkəmli siyasi və ictimai xadim, filosof, ilahiyyatçı, şair, bir sıra kitabların müəllifi Heydər Camalla görüşlərindən bəhs edən füsunkar hekayəsi ilə başladı. O bu heyrətamiz azərbaycanlı haqqında, bu istedadlı insan vasitəsilə Azərbaycanı necə kəşf etdiyi barədə xatirələrini bölüşdü. Şevçenko müəllimi hesab etdiyi Camalın bir çox regional problemlərə baxışından, o cümlədən Qarabağ münaqişəsinin inkişafı ilə bağlı proqnozlarından söz açdı. Qeyd etmək lazımdır ki, Heydər Camal hələ 2020-ci ilin sentyabrında azadlıq müharibəsi başlamazdan xeyli əvvəl öz proqnozlarını açıqlayıb və bu rusiyalı mütəfəkkirin dedikləri  gerçəkləşib.

Şevçenkonun məharətlə hazırladığı, dəfələrlə alqışlarla kəsilən monoloqu gecənin iştirakçılarının dərhal böyük marağına səbəb oldu və onları məftun etdi. Tamaşaçılar tərəfindən verilən suallar müxtəlif və çoxsaylı idi. Şəxsən mən onunla görüşə gələnlərin biliyinin dərinliyinə, gəncliyinə heyran oldum. Onların sualları təkcə geosiyasi hadisələrə marağı deyil, həm də müxtəlif fəlsəfi cərəyanları dərindən dərkini əks etdirirdi.

Maksim Şevçenko maraqlı və məhsuldar dialoq mühiti yaradaraq hər bir suala yüksək peşəkarlıqlaə cavab verdi. Bir an kimi uçan dörd saata yaxın görüş ərzində hamımız ideya və təhlil dünyasına qərq olduq.

Maraqlı axşama və mövqeyinizə görə təşəkkür edirəm, Maksim!

Azər Əsgərov

Allahdan bütün şəhidlərimizə rəhmət, qazilərimizə şəfa diləyirəm! Onlara ehtiramımız əbədidir! Yaşasın Azərbaycan Ordusu!

Azər Əsgərov

Azərbaycanın yeniyetmə və gənc cüdoçularının dünya və Avropa çempionatlarındakı parlaq qələbələrindən sonra böyüklərdən ibarət yığma komandamız da bizi öz uğurları ilə sevindirdi. Ümummilli Lider Heydər Əliyevin 100 illik yubileyi münasibətilə Bakıda Milli Gimnastika Arenasında keçirilən cüdo üzrə “Böyük dəbilqə” turnirində cüdoçularımız 3 qızıl, 1 gümüş, 1 bürünc medal qazandı və komanda hesabında bu mötəbər yarışın birincisi oldu. Bu qələbə Ulu Öndərin ruhuna sonsuz ehtiramın ifadəsidir.

Yaşar Nəcəfovun (-66 kq), vaxtilə “Judo Club 2012”də də məşq etmiş Hidayət Heydərovun (-73 kq) və Zelim Tçkayevin (-81 kq) qızıl, Leyla Əliyevanın (-48 kq) gümüş, “Judo Club 2012”nin üzvü Zelim Kotsoyevin (-100 kq) bürünc medal qazanmaları Azərbaycan cüdo ailəsinə böyük qürur hissi bəxş etdi.

Turnir çox gərgin idman mübarizəsi şəraitində keçdi. Bakıya 61 ölkədən ən güclü cüdoçular gəlmişdilər. Azərbaycanın müvafiq dövlət qurumları, Azərbaycan Cüdo Federasiyası tərəfindən turnirin ən yüksək səviyyədə keçirilməsi təmin olunmuşdu.

Yarışın ilk günlərinin qəhrəman Ordumuzun Qarabağda zəfərlə başa çatan antiterror tədbirləri keçirdiyi bir vaxta təsadüf etməsi, təbii ki, yığma komandamızın üzvlərinə də yüksək döyüş və qələbə ruhu gətirdi.

Müasir Azərbaycan dövləti möhtəşəm zəfərləri Müzəffər Ali Baş Komandan, möhtərəm Prezident İlham Əliyevin müdrik və qətiyyətli rəhbərliyi ilə qazanır. Ölkəmizdə idmanın, o cümlədən cüdonun uğurları da dövlətimizin başçısının bu sahəyə göstərdiyi diqqət və qayğının nəticəsidir.

“Böyük dəbilqə” turnirində qələbə münasibəti ilə cüdo ailəsinin hər bir üzvünü, idmançıları və məşqçilər heyətini təbrik edir, gələn Olimpiya ilində də onlara uğurlar arzulayıram!

Azər Əsgərov

Bu gün Bakıda dahi Heydər Əliyevin 100 illik yubileyinə həsr olunmuş cüdo üzrə Böyük Dəbilqə turnirinə start verilib. Bu yarışlar cüdo aləmində əlamətdar hadisədir və bütün dünya cüdoçuları üçün ən mötəbər turnirdir.

Bütün idmançılara – paytaxtımıza gələnlərə, xüsusən də Azərbaycan yığmasındakı bacı-qardaşlarıma uğurlar arzulayıram. Onlar ən parlaq qələbələrə layiqdirlər.
Uğur olsun!!!

Azər Əsgərov

15 sentyabr hamımız üçün, o cümlədən mənim üçün xüsusilə sevincli gündür! Çünki nəvələrimi məktəbə yola salıram və səmimi etiraf edim ki, elə bil özüm də yenidən dərsə gedirəm, müəllimlərimlə, sinif yoldaşlarımla görüşə tələsirəm… Həm sevinirəm, həm narahatam, amma bütün hallarda nəvələrim üçün hər şeyin əla olacağına da inanıram. Məncə, bütün nənələr və babalar, eynən ata-analar kimi, yeni dərs ili başlayanda belə sevinc dolu həyəcan yaşayırlar.

Hə, bir də 2023-cü dərs ili ölkəmiz üçün ona görə əlamətdardır ki, biz Füzulidə və Laçında yeni məktəblərin fəaliyyətə başlamasının şahidi olduq. Bu il Füzulidə istifadəyə verilən məktəbdə ilk dəfə 15 müəllim 160 uşağa dərs deyəcək. Laçında isə 32 ildən sonra bərpa olunmuş məktəbdə ilk zəng çalınıb.

Təbii ki, biz hamımız bundan qürur duyuruq, ölkəmizlə, onun nailiyyətləri ilə fəxr edirik. Bu onu göstərir ki, biz çətinliklərə baxmayaraq öz doğma torpağımızı bərpa edə bilirik, övladlarımızın, nəvələrimizin gələcəyi üçün təminat yaradırıq.

Xatırlayaq ki, erməni vandalları tərəfindən dağıdılmış Ağalı kəndi 2020-ci ildə qazanılan möhtəşəm Qələbədən sonra Prezident, Ali Baş Komandan İlham Əliyevin tapşırığı ilə ən qısa zamanda necə tamamilə bərpa edildi…  Müharibə başa çatdıqdan cəmi bir il sonra kənddə yeni tiklimiş məktəbdə dərslər başladı və geri qayıdan sakinlərin normal yaşaması üçün hər cür şərait yaradıldı. Bundan əvvəl, hələ 2016-cı ildə isə Lələtəpə strateji yüksəkliyi və digər ərazilər işğaldan azad edilmiş, Cəbrayıl rayonunun Çoçuq Mərcanlı kəndində tədris prosesi bərpa olunmuşdu.

Sevindirici haldır ki, soydaşlarımızın işğaldan azad edilmiş öz tarixi torpaqlarına, doğma yurdlarına, yenidən tikilmiş evlərinə Böyük Qayıdışının birinci mərhələsi başlayıb. Azərbaycanın Qarabağ və Şərqi Zəngəzur iqtisadi rayonlarındakı tikinti bumu onu deməyə əsas verir ki, biz tezliklə bu ərazilərdə yenidən salınan şəhər və kəndlərdə minlərlə məktəbdən, yüz minlərlə məktəblidən danışacağıq.

Məlum olduğu kimi, bu günə təkcə Heydər Əliyev Fondunun xətti ilə ölkəmizdə inşa edilən məktəblərin sayı 500-ə çatır. Bu, çox böyük nailiyyətdir, ölkəmizdə gənc nəslin təhsilinə göstərilən qayğının təzahürüdür!

Hazırkı Bilik Günü təkcə yeni tədris ilinin başlanğıcı deyil, həm də Qarabağımızın, tariximizin, qürurumuzun Dirçəliş Günüdür.

Qoy bu il hamımıza, Azərbaycan vətəndaşlarına yeni imkanlar, biliklər, ümidlər bəxş etsin. Qoy məktəbə gedən hər bir uşaq, hər bir nəvə bilsin ki, o öz gələcəyinə doğru addımlayır və biz böyüklər də onlarla fəxr edib, qürur duyacağıq.

Bayramınız mübarək, əziz həmvətənlər!

Azər Əsgərov