English 
Azərbaycan 
Русский 
Dekabrın 10-da Bakının Azadlıq meydanında Vətən müharibəsində Qələbəyə həsr olunmuş Zəfər paradı keçirildi.
Paradda Azərbaycan Respublikasının Prezidenti İlham Əliyev, birinci xanım Mehriban Əliyeva, Türkiyə Respublikasının Prezidenti Rəcəb Tayyib Ərdoğan və xanımı Əminə Ərdoğan Zəfər paradında iştirak edirdilər.
Vətən müharibəsində – “Dəmir yumruq” əməliyyatında Azərbaycan işğalçı Ermənistana elə zərbə vurdu ki, bu təcavüzkar ölkənin bir də özünə gəlməsi mümkünsüzdür. Zəfər paradında möhtərəm Prezident, Müzəffər Ali Baş Komandan cənab İlham Əliyev dedi: “Bu gün biz qəhrəman xalq kimi bu bayramı qeyd edirik. Azərbaycanın müzəffər Ordusu öz tarixi missiyasını yerinə yetirdi, Ermənistanı məğlub etdi. Ermənistan ordusu demək olar ki, yoxdur, məhv edilib. Bundan sonra əgər erməni faşizmi bir daha baş qaldırsa, nəticə eyni olacaq. Yenə Azərbaycanın dəmir yumruğu onların belini qıracaq”.
Paradda Türkiyə Prezidentinin, qardaş ölkənin böyük nümayəndə heyətinin, həmçinin ordu bölməsinin iştirakı xaqlqımızda fərəh hissi doğurdu.
Türkiyənin siyasi və mənəvi dəstəyi hər bir azərbaycanlını qürurlandırır, sevindirir. Zəfər paradı bir daha bizim birliyimizi həm xalqlarımıza, həm də bütün dünyaya göstərdi.
Türkiyə Respublikasının Prezidenti hörmətli Rəcəb Tayyib Ərdoğan paraddakı çıxışında xalqımıza “azərbaycanlı can qardaşlarım” deyə müraciət etdi, Zəfər Günümüzdə bizimlə birlikdə olmaqdan böyük məmnunluq duyduğunu bildirdi. Azərbaycanın 44 gün davam edən şanlı mübarizəsində şəhid olan igidlərə Uca Allahdan rəhmət dilədi, qazilərin tezliklə sağalmalarını arzuladı.
Paradda Azərbaycan özünün qəhrəman əsgər və zabitlərinin döyüş əzmini və ordumzun mənəvi-texniki gücünü nümayiş etdirdi. Ən müasir silah-sursatlarımız, yəqin ki, düşməni bir daha qorxuya salacaq. Vətən müharibəsində ordumuzun əldə etdiyi hərbi qənimətlərin nümayişi isə məğlub Ermənistanın hələ də ağlı başına gəlməyən “siyasətçilər”nə, axır ki, dərs olmalıdır. Bu xəyalpərəstlər müharibədən qabaq öz tanklarının Bakıya gələcəyini deyirdilər. Onların döyüş meydanında qoyub qaçdığı tankları Azərbaycan əsgəri qənimət kimi Bakıya gətirdi və bütün dünyaya göstərdi.
Yaşasın, müstəqil Azərbaycan Respublikası! Yaşasın, müzəffər Azərbaycan Ordusu!
Vətən müharibəsində bizə Zəfər qazandıran şəhidlərimizə Allahdan rəhmət diləyir,qazilərmizə şəfa və rifah arzulayırıq!
Azərbaycan Respublikasının Prezidenti, Ali Baş Komandan İlham Əliyev:
“…Otuz il ərzində həm Ermənistan rəhbərliyi, həm onların havadarları, ermənipərəst, azərbaycanafob qüvvələr tərəfindən ortalığa müxtəlif uydurmalar atılırdı ki, bəli, Ermənistanın güclü ordusu var, erməni xalqı döyüşkən xalqdır, Azərbaycan xalqı döyüşə bilmir. Məhv etmişik bu uydurmanı, göstərmişik ki, kim döyüşkən xalqdır, göstərmişik ki, kim müzəffər xalqdır”.
Füzuli şəhərində çıxışından. 16 noyabr 2020-ci il.
Azərbaycan öz tarixinin çox şərəfli dövrünü yaşayır.
Bu il sentyabrın 27-də təcavüzkar Ermənistanın növbəti hərbi təxribatına cavab olaraq Azərbaycan Ordusunun həyata keçirdiyi əks-hücum əməliyyatı noyabrın 10-da düşmənin təslim olması, ölkəmizin ərazi bütövlüyünün tam bərpa olunması ilə başa çatdı.
Xalqımız Vətən müharibəsində böyük zəfər qazandı.
Möhtərəm Prezident, Müzəffər Ali Baş Komandan cənab İlham Əliyevin rəhbərliyi ilə rəşadətli ordumuz təcavüzkar Ermənistanın 30 ilə yaxındır davam edən işğalına son qoydu. Dövlətimizin başçısının bəyan etdiyi məqsəd və məram reallığa çevrildi: Qarabağ bizimdir! Qarabağ Azərbaycandır!
Vətən müharibəsinin davam etdiyi müddətdə bizim hər birimizin qəlbi düşmənə qarşı qəhrəmanlıqla döyüşən igid hərbçilərimizlə birgə döyünüb, fikrimiz onların yanında, dualarımız onlarla olub.
Azərbaycan Silahlı Qüvvələrinin rəşadətli və cəsur şəxsi heyəti hərb tarixinə şanlı səhifələr yazaraq, təcvüzkar Ermənistanı diz çökməyə, onun işğalçı ordusunu qorxaqcasına öz mövqelərini qoyub qaçmağa məcbur etdi.
Qarabağın tacı olan Şuşada üçrəngli müqəddəs bayrağımızın dalğalandırılması milli qürurumuzun təntənəsidir. Bu qədim şəhərin düşməndən azad edilməsi misilsiz hərbi əməliyyat kimi tarixin yaddaşına yazıldı.
Uzun illər işğal altında qalan torpaqlarımızı qəhrəman şəhidlərimiz öz qanı və canı bahasına azad edib. Rəşadətli əsgər, gizir və zabitlərimiz yüksək vətənpərvərlik ruhu, əsl peşəkarlıq keyfiyyətləri nümayiş etdiriblər.
Allahdan bütün şəhidlərimizə rəhmət, yaralılarımıza şəfa diləyirik!
Şəhidlərimizin ruhu qarşısında baş əyirik, onların validyenlərinə, ailə üzvlərinə dərin ehtiramımızı bildiririk.
Vətən müharibəsində möhtəşəm Zəfərin sevincini yaşamaq bizim üçün böyük xoşbəxtlikdir.
İşğaldan azad edilmiş torpaqlarımızda, dogma Qarabağda tezliklə bərpa-quruculuq işlərinə başlanacaq. Hər birimiz üçün əziz olan həmin ərzilərdə çalışmaq, xalqımızın öz ata-baba yurdlarında əbədi olaraq təhlükəsiz və firavan yaşaması üçün şərait yaradılmasında fəal iştirak etmək ən böyük arzumuzdur.
Möhtərəm Prezdent, Müzəffər Ali Baş Komandan cənab İlham Əliyevin xalqa müraciətində dediyi kimi: Cəbrayıl bizimdir, Füzuli bizimdir, Zəngilan bizimdir, Qubadlı bizimdir, Ağdam bizimdir, Kəlbəcər bizimdir, Laçın bizimdir, Şuşa bizimdir, Qarabağ bizimdir! Qarabağ Azərbaycandır! Eşq olsun Azərbaycan xalqına! Yaşasın Azərbaycan!
Azər ƏSGƏROV
Bu ilin əvvəlindən dünyanı bürümüş koronavirus infeksiyası (COVID-19) Azərbaycanda da yayılıb və ölkə əhalisnin sağlamlığına təhlükə yaradıb. Bununla əlaqədar olaraq, cənab Prezident İlham Əliyev “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 19 mart 2020-ci il tarixli Fərman imzalayıb. Fərmanda müəyyən olunan tədbirlərə əhalinin müxtəlif təbəqələri, o cümlədən sahibkarlıq subyektləri dəstək verərək sosial həmrəylik nümayiş etdirirlər.
Koronavirusun ölkə ərazisində yarada biləcəyi təhlükənin qarşısının alınması, profilaktik və təxirəsalınmaz tədbirlər həyata keçirilməsi məqsədilə Nazirlər Kabinetinin yanında aidiyyəti dövlət orqanlarının və qurumlarının rəhbər şəxslərindən ibarət Operativ Qərargah fəaliyyət göstərir.
Dövlətimizin başçısının Fərmanı əsasında yaradılmış Koronavirusla Mübarizəyə Dəstək Fonduna vətəndaşların, sahibkarlıq subyektlərinin etdikləri ianələr əhalinin sağlamlığının qorunması, dünya standartlarına uyğun tibbi yardımla təmin olunması imkanlarını genişləndirir.
“Azman Holding” MMC və onun təsisçiləri də korporativ sosial məsuliyyət prinsiplərini əsas götürərək koronovirusla mübarizəyə dəstək verirlər.
Belə ki, “AZMAN holding” Koronavirusla Mübarizəyə Dəstək Fonduna 100 min manat vəsait keçirib və holdinqin təsisçiləri təfəindən də Fonda iri məbləğdə pul vəsaiti ianə olunub. Bundan başqa, Bakı şəhərinin Mərdakan qəsəbəsindəki tibb müəssisəsində COVİD-19 xəstələrinin müalicəsini həyata keçiriən həkimlərinin yemək rasionu 3 ay müddətində meyvə-tərəvəzlə təmin edilib.
Koronavirusla mübarizədə dövlət-vətəndaş birliyi mühüm əhəmiyyət daşıyır. “AZMAN holding” bu mübarizəyə dəstəyini davam etdirir.
Biz birlikdə güclüyük!
Avqustun 15-16-da “Sərhədçi” İdman Olimpiya Mərkəzində 23 yaşınadək gənclər arasında cüdo üzrə Azərbaycan birinciliyi keçirilib. Yarışda 51 klubu təmsil edən 347 (294 oğlan, 53 qız) cüdoçu medallar uğrunda mübarizə aparıb. “Judo Club 2012”nin gənc cüdoçuları da ölkə birinciliyində qüvvələrinin sınayıblar.
Yarışda 24 (18 oğlan, 6 qız) idmançı ilə təmsil olunan klubun yetirmələri 4 qızıl, 6 gümüş və 3 bürünc medala layiq görülüblər. Komandanın üzvlərindən Elçin Hüseynov (66 kq), Samir Ağayev (81 kq), Diana Şoranova (63 kq) və Aidə Baxışova (70 kq) bütün rəqiblərinə qalib gələrək Azərbaycan çempionu adını qazanıblar. Nurlan Osmanov (66 kq), Sərdar Səfixanov (90 kq), Kənan Əhmədov (+100 kq), Elvira Əsgərova (52 kq), Zeynəb Məmmədova (57 kq) və Nərmin Abdullayeva (70 kq) gümüş medala sahib olublar. Yaşar Nəcəfov (60 kq), Fərid Qəzənfərov (60 kq) və Ayxan Tanverdiyev (66 kq) isə komandaya bürünc medallar qazandırıblar.
Klubun digər üzvlərindən Vilayət Cəlilov (66 kq) beşinci, Mirəli Hüseynli (90 kq), Murad Məmmədov (100 kq) və Rahidə Cavadova (63 kq) isə yeddinci yerlə kifayətləniblər.
Beləliklə, 23 yaşınadək gənclər arasında Azərbaycan birinciliyini 13 medalla başa çatdıran “Judo Club 2012”nin yetirmələri ümumi komanda hesabında birinci yeri tutublar. “Neftçi İdman Klubu” İB-in yetirmələri (4 qızıl, 1 gümüş, 5 bürünc) ikinci, “Atilla” komandası isə (2 qızıl, 1 gümüş, 2 bürünc) üçüncü olub.
Ölkə birinciliyinin qalib və mükafatçıları medallar və Azərbaycan Cüdo Federasiyasının diplomları ilə təltif olunublar.
Xatırladaq ki, son illərdə uğurları ilə diqqət çəkən “Judo Club 2012”nin gənc cüdoçuları iyun ayında təşkil olunan 23 yaşınadək gənclər arasında açıq Bakı birinciliyinin də qalibi olub.
Dünya şöhrətli braziliyalı döyüşçü, adı UFC-nin (Ultimate Fighting Championship) Şöhrət zalına daxil edilmiş ciu-citsu ustası Roys Qreysi Azərbaycan Ciu-Citsu Federasiyasının və “Qodzilla” qrupun təşkilatçılığı ilə iyulun 19-da Bakıya səfərə gəlib. “Heydər Əliyev” Hava Limanında onu qarşılayanlar arasında “Judo Club 2012”nin rəhbərləri də olub.
Roys Qreysi iyulun 20-də “Judo Club 2012”nin böyük zalında məşqçilər və idmançılar üçün seminar keçib. 100-dən çox idmançı və məşqçinin iştirak etdiyi seminarı döyüş növləri üzrə respublika federasiyalarının rəhbərləri, tanınmış idmançılar, ictimaiyyət və media nümayəndələri izləyiblər.
“Judo Club 2012” idman klubunun təsisçisi, Azərbaycan Cüdo Federasiyası İcraiyyə Komitəsinin üzvü, cüdo üzrə veteran ustalar arasında dünya və Avropa çempionatlarının dəfələrlə qalibi və mükafatçısı Azər Əsgərov dünya şöhrətli ciu-citsu ustası ilə görüşüb, onun keçirdiyi seminarda iştirak edib. Səmimi söhbət zamanı Azər Əsgərov hörmətli qonağa ölkəmizdə idmana göstərilən diqqət və qayğıdan söz açıb, Azərbaycan Cüdo Federasiyasının fəaliyyəti, cüdo idman növündə əldə olunan nailiyyətlər, həmçinin “Judo Club 2012”nin bu və digər döyüş növlərinin təbliği, uşaq və gənclər arasında populyarlıq qazanması üçün gördüyü işlər barədə məlumat verib.
Roys Qreysi iki saatlıq semnardan sonra judoclub2012.az saytına müsahibə verərkən “Judo Club 2012”də məşq üçün yaradılmış şəraiti yüksək qiymətləndirərək deyib: “Belə bir zalda məşq edən idmançı nailiyyət qazanmaya bilməz”. O, seminarın təşkilində və uğurla keçirilməsinə göstərdiyi dəstəyə görə “Judo Club 2012″nin rəhbərliyinə minnətdarlıq bildirib. Azər Əsgərov və klubun cüdo üzrə baş məşqçisi, Əməkdar məşqçi Tərlan Həsənov dünya şöhrətli idmançıya klubun adından qiymətli hədiyyə təqdim ediblər.
Azər Əsgərov özü isə seminarın təşkilinə göstərdiyi dəstəyə görə Azərbaycan Ciu-Citsu Federasiyasın təşəkkürnaməsinə layiq görülüb. Təşəkkürnaməni ona federasiyanın prezidenti Mir-Əli Seyidov təqdim edib.
Rusiyalı məşhur aşpaz Azərbaycan dolmasını dünya kulinariyasının şedevri adlandırıb
Bu günlərdə Bakıda I Dünya İslam Kulinariya Konqresi və Dünya İslam Kulinariya Təşkilatının II Konfransı, həmçinin İslam ölkələri kulinarlarının ikinci çempionatı keçirilib. Dünya İslam Kulinariya Birliyinin (WICS) rəhbərlərinin iştirak etdiyi bu tədbirlər xalqımızın mətbəx mədəniyyətinin və qonaqpərvərliyinin təbliğində mühüm rol oynayıb.
Paytaxtımızın “Sity servis kompany” restoranlar şəbəkəsi də 25 ölkənin təmsil olunduğu bu tədbirlərdə fəal iştirak edib. Şəbəkənin tərkibindəki “Nar & Sharab”, “Mangal Steak House”, “Sədəf”, “Zuğulba Saray”, “Senator”, “Sapfir Saray”, “Atəşgah” restoranlarının milli və dünya mətbəxinin sirlərini mükəmməl bilən təcrübəli aşpazları çempionatda öz məharətlərini göstəriblər.
Kulinarlar həm fərdi, həm də komanda şəklində yarışıblar. Azərbaycan Kulinariya Mərkəzinin təşəbbüsü ilə kulinariya çempionatında şadlıq sarayları “bəy-gəlin” və “qonaq süfrəsi”, mehmanxanalar “Azərbaycan səhər yeməyi”, ketrinq şirkətləri “Azərbaycan mətbəx furşeti” kateqoriyasında orijinal menyular təqdim ediblər. Digər nominasiyalar, məsələn şirniyyat, müxtəlif mətbəx incəsənəti sinifləri üzrə (şokolad, marsipan, karvinq və s.) də yarışlar keçirilib. Yeri gəlmişkən qeyd edək ki, münsiflər heyətinin üzvü Rusiya Kulinarlarının Milli Assosiasiyasının prezidenti, məşhur Kreml aşpazı Viktor Belyayev milli kulinariyanın inkişafında ölkəmizin öncül yerlərdən birini tutduğunu bildirib. O, Azərbaycan dolmasını dünya kulinariyasının şedevri adlandırıb.
Çempionatda Viktor Belyayevin də maraqla izlədiyi və yüksək dəyərləndirdiyi təqdimatlardan biri paytaxtımızın ən nüfuzlu restoranlarından olan “Mangal Steak House”da olub. Restoranın peşəkar aşpazları tədbir iştirakçılarını dadlı və keyfiyyətli yeməklərlə yanaşı, həm tə mətbəx şousu ilə heyrətləndiriblər.
“Sity servis kompany”nin direktoru Namiq Məmmədov deyir: “Şirkətin tərkibindəki restoranların kulinarları çempionatda böyük həvəslə çıxış etdilər. WICS-in münsifləri onların məharətini yüksək dəyərləndirdi. Bundan sonra isə aşpazlarımız olimpiadaya hazırlaşacaqlar. Çalışırıq ki, onlar təkcə islam ölkələri təmsilçiləri arasında deyil, Avropada da öz peşəkarlıqları ilə seçilsinlər”.
“Sity servis kompany”nin aşpazları islam ölkələri kulinarlarının mötəbər tədbirinə şirkətin brend-şefi – baş aşpazı Oqtay Cəfərovn rəhbərliyi ilə hazırlaşıblar. Təcrübəli və tanınmış kulinariya ustası tədbir ərəfəsində keçirilən təlimlərdə onlara islam və dünya mətbəxinin müasir trendləri, iaşə xidmətinin beynəlxalq standartları, milli qonaqpərvərliyimizin ən mühüm xüsusiyyətləri barədə zəruri bilgilər verib.
Azərbaycan Kulinariya Mərkəzinin üzvü olan Oqtay Cəfərov 50 ilə yaxındır ki, sevib-seçdiyi aşpazlıq peşəsi ilə məşğuldur. O, çox mötəbər yerli və beynəlxalq tədbirlərdə, respublikamızda və dünya miqyasında xalqımızın mətbəx mədəniyyətinin təbliğinə sanballı töhfələr verib, çoxsaylı mükafatlara layiq görülüb.
Yüsək keyfiyyətli yemək və nümunəvi xidmət “Sity servis kompany” restoranlar şəbəkəsinin fəaliyyətinin iki mühüm komponentidir. Bu şəbəkədə təkcə xalqımızın mətbəx mədəniyyətinin deyil, tarixinin, ədəbiyyatının, incəsənətinin, ümumən, milli özünəməxsusluğunun təbliğinə böyük diqqət yetirilir. Məhz buna görə də ““Sity servis kompany” şəbəkəsinin restoranları paytaxtımızın sakinlərinin və qonaqlarının, xüsusən, turistlərinin ən sevimli, ən çox arzu edilən, seçilən iaşə və istirahət məkanlarıdır.
Düşmən təxribatının qarşını almaq üçün Azərbaycan Ordusunun 2016-cı ilin aprelində keçirdiyi uğurlu döyüş əməliyyatları müasir hərb tariximizin şanlı səhifəsidir. Bu əməliyyatlar nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində indi üçrəngli bayrağımız dalğalanır.
Qələbə uğrunda canını qurban verən şəhidlərimizin xatirəsi daim ehtiramla yad edilir, onların qəhrəmanlıq nümunəsi gənclərimizin vətənə məhəbbət ruhunda tərbiyə olunmasında mühüm rol oynayır. Şərəfli zabit ömrü yaşamış və Aprel döyüşlərində şəhid olmuş əfsanəvi kəşfiyyatçı, polkovnik-leytenant Raquf Orucov da belə qəhrəmanlardandır.
“Azman Holdinq”in tərkibinə daxil olan “Judo Club 2012” idman klubu bu il aprelin 16-17-də Bakı İdman Sarayında Raquf Orucov və digər Aprel şəhidlərinin xatirəsinə həsr olunmuş III beynəlxalq “Raquf Orucov Kuboku” (“Raguf Orujov Cup”) cüdo turniri keçirəcəkdir. Azərbaycan Respublikasının Gənclər və İdman Nazirliyinin, Azərbaycan Cüdo Federasiyasının dəstəyi ilə təşkil olunacaq turnirdə yaşı 21-dək (U-21) olan gənclərdən ibarət 16 klub komandası iştirak edəcəkdir.
Ənənəvi turnirdə Bakı şəhərini və bölgələimizi təmsil edən komandalarla birlikdə qonşu ölkələrin – Türkiyənin, Rusiyanın, Qazaxıstanın, İranın və Gürcüstanın klub komandalarının da iştirak edəcəyi gözlənilir.
Şəhidlərimizin xatirəsinə hörmət və ehtiram əlaməti olaraq keçirilən turnirin məqsədi gənclərə vətənpərvərlik hissi və döyüş ruhu aşılamaq, onların Vətənin müdafiəsinə hazırlıq səviyyəsini artırmaq, həmçinin idmançılar arasında dostluq və yoldaşlıq hisslərini möhkəmləndirməkdir.
Azər Əsgərov: “Harada tatami varsa, orada yaponlar özlərini ev sahibi saya bilərlər”
2018-ci il sentyabrın 20-dən 27-dək Bakıda Milli Gimnastika Arenasında cüdo üzrə növbəti dünya çempionatı keçirildi.
Cüdonun vətəni olan Yaponiyanın milli komandası dünya çempionatına hazırılığn son mərhələsini Azərbaycanda keçməyi qərara alaraq iki ay əvvəl öz nümayəndələrini Bakıya göndərmişdi. Yapon mütəxəssislər öz komandalarının tələblərinə və standartlarına uyğun yer seçmək üçün bir slra idman arenalarına baş çəkdikdən sonra yekdilliklə “Judo Club 2012”-nin üzərində dayandılar. Qonaqlar buradakı zalların və köməkçi infrastrukturun məşqləri ən yüksə
k səviyyədə təşkil etməyə imkan verdiyini bildirdilər. Xalqımızın qonaqpərvərlik ənənəsinə əsasən, bütün bu təsərrüfatın Yaponiya komandasının istifadəsinə təmənnasız olaraq verilməsi barədə klub rəhbərliyinin qərarını isə gündoğar ölkənin nümayəndələri böyük minnətdarlıq hissi ilə qarşıladılar.
Dünya şöhrətli yapon cüdoçular sentyabrın 14-dən Bakıya gəldilər. “Judo Club-2012” İctimai Birliyinin sədri, Azərbaycan Cüdo Federasiyası İcraiyyə Komitəsinin üzvü, cüdo üzrə veteran ustalar arasında dünya və Avropa çempionatlarının dəfələrlə qalibi olmuş Azər Əsgərov qonaqlarla görüşdü, onlara ölkəmizdə idmana göstərilən dövlət qayğısı, Azərbaycanda cüdonun tarixi və mövcud vəziyyəti, Azəbaycan Cüdo Federasiyasının fəaliyyəti, “Judo Club-2012”-də yaradılmış məşq şəraiti, klub idmançılarının uğurları barədə ətraflı məlumat verdi. “Harada tatami varsa, orada yaponlar özlərini ev sahibi saya bilərlər,” – deyən A.Əsgərov intensiv və səmərəli məşq üçün klubda bütün imkanların olduğunu, mövcud infrastrukturun tam olaraq yapon cüdoçularun istifadəsinə veriləcəyini bildirdi.
Yaponiya komandası Azrbaycanda ilk dəfə keçiriləcək cüdo üzrə dünya çempionatına, idmançılar, məşqçilər və yardımçı heyət daxil olmaqla, 90 nəfərlik heyətlə gəlmişdilər.
Dünya çempionatında tam heyətlə – 18 cüdoçu təmsil olunan Yaponiya komandasının üzvləri 16 çəki dərəcəsində mükafata layiq yerlər tutdular. Onlar 7 qızıl, 5 gümüş və 4 bürünc medal qazanaraq komanda hesabında birinci oldular.
“Gündoğar ölkə”nin cüdoçuları bu möhtəşəm uğurda “Judo Club-2012”nin də payının olduğunu bildirlər.
Azərbaycanda gördüikləri qonaqpərvərliyə cavab olaraq yaponlar çempionat başa çatdıqdan sonra “Judo Club-2012” idman klubunda master-klass təşkil etdilər. Master-klassa ölkəmizin tanınmış klublarından məşqçilər və idmançılar da dəvət olunmuşdular.
Azər Əsgərov master-klasda veteran idmançı kimi iştirak etdi, buradakı yapon cüdo ustaları ilə söhbətləşdi, cüdonun müasir vəziyyəti ilə bağlı fikilərini onlarla bölüşdü.
Yaponiya komandasına “Judo Club-2012” idman klubunun rəhbərliyi adından qiymətli hədiyyə və xatirə vımpelləri təqdim olundu. Qonaqlar isə Azər Əsgərovu və klubun digər rəhbərlərinə xüsusi diplomla mükafatlandırdı.
Sonra yapon cüdo ustaları – dünya çempionu (2010) Akimodo Hiroyuki, dünya (2003) və olimpiya (2004) çempionu Sudzuki Keiji, üçqat dünya çempionu, Sidney Olimpiadasının (2000) qalibi İnoue Kosey və qadınlar arasında Afina olimpiadasının (2004) qalibi, dünya çempionu (2007) Tsukada Maki öz ustalıqlarını nümayiş etdirib, müxtəlif fəndlərin yerinə yetirilməsi barədə nəzəri və praktik tövsiyələr verib, azərbaycanlı məşqçilərin suallarını cavablandırdılar.
15 Mart 2018-ci ildə Bakı Olimpiya Stadionunun konfrans salonunda Azərbaycan Cüdo Federasiyasının hesabat konfransı keçirilib.
Federasiyanın Baş katibi Elmar Babanlı Azərbaycan cüdosunun 2017-ci ildəki nailiyyətləri haqqında danışıb.
Maliyyə hesabatı dinlənildikdən sonra, konfrans iştirakçıları Azər Əsgərovun Azərbaycan Cüdo Federasiyasının İcraiyyə Komitəsinə üzv seçilməsinin lehinə səs veriblər.
Konfransı yekunlaşdıran federasiya prezidenti Rövnəq Abdullayev deyib: “Gördüyümüz kimi, böyük işlər həyata keçirilib. Bu işlərə görə hamıya təşəkkür edirəm. Bunlar – aysberqin görünməyən tərəfləridir. Məşqçilərimizin və əməkdaşlarımızın səyi nəticəsində idmançılarımız medallar qazanırlar. Qarşıda bizi daha böyük işlər gözləyir. Bakıda dünya çempionatının keçirilməsi bu ilki yarışların zirvəsi olacaq. Yarışlar zamanı komandaların yaxşı çıxış etməsi üçün zalın tamaşaçılarla dolu olması lazımdır. Biz ilk dəfədir ki, böyüklər arasında cüdo üzrə dünya çempionatını təşkil edirik və onu ən yüksək səviyyədə keçirməliyik”.
