English 
Azərbaycan 
Русский 
Azərbaycan xalqı öz tarixinin qanlı səhifələrini, məruz qaldığı soyqırımı cinayətlərini heç vaxt unutmur və unutmayacaq… Erməni millətçilərinin 1918-ci ilin mart-aprel aylarında Bakıda və digər ərazilərmizdə on minlərlə insanı qəddarcasına qətlə yetirməsi təkcə xalqımıza qarşı deyil, ümumən, insanlığa qarşı ən ağır cinayət olmuşdur.
Sonrakı dövrdə də Ermənistan azərbaycanlılara qarşı etnik nifrət və dözümsüzlük, deportasiya siyasəti aparmış, ötən əsrin sonlarında Qarabağdakı müvəqqəti işğal etdiyi ərazilərdə soyqırımı cinayətlərini davam etdirmişdir. Xocalıda, Bağanıs-Ayrımda, Qaradağlıda, Malıbəylidə, Kəlbəcərdə və digər yaşayış məntəqələrimizdə erməni quldur dəstələrinin dinc əhaliyə qarşı törətdiyi kütləvi qırğınlar, amansız soyqırımı tarixin yaddaşına əbədi həkk olunmuşdur.
Qüdrətli Azərbaycan dövləti, şanlı ordumuz soyqırımı cinayətlərində həyatını itirmiş həmvətənlərimizin qanını döyüş meydanında aldı. Bu gün işğaldan azad edilmiş ərazilərimizin hər bir guşəsində üçrəngli bayrağımızın qürurla dalğalanması soyqırımı qurbanlarının, bütün şəhidlərimizin ruhunu şad edir, onların xatirəsinə ehtiramın təcəssümüdür.
Biz tarixin müxtəlif dövrlərində soyqırımına məruz qaısaq da, ermənilərdən fərqli olaraq, heç vaxt özümüzü yazıq, əzabkeş xalq kimi qələmə verməmişik, milli qürurumuzu öz döyüşkənliyimizlə, mübarizliyimizlə qoruyub saxlamışıq və buna görə də Vətən savaşında qalib gəlmişik.
Soyqırımı qurbanlarının, xatirəsini ehtiramla yad edir, onlara Allahdan rəhmət diləyirəm.
Azər Əsgərov
Qış ömrünü yaza bağışlayır: yurdumuza bahar fəsli və onunla birgə xalqımızın xüsusi sevinc və hərarətlə qeyd etdiyi, yeni ilin başlanmasının rəmzi olan Novruz bayramı gəlir.
Bu il Novruzun müqəddəs Ramazan ayına təsadüf etməsi xüsysilə əlamətdardır: bu ay Allaha ibadət, itaət və dua ayıdır. Ramazan həm də ilahi mərhəmət ayı olduğundan Novruz bayramının keçirilməsinə də heç bir məhdudiyyət qoyulmur. Oruc tutmayanlar qınanılmır, belə ki, oruc tutmaq səhhəti imkan verən hər bir müsəlmanın borcudur.
Novruz bayramını hər evdə qohumlar, dostlar yığışaraq birlikdə qeyd edirlər. Bayrama hazırlıq onun gəlməsindən çox əvvəl başlayır. Qadınlar müxtəlif yeməklər və Şərq şirniyyatları hazırlayırlar. Ənənəvi olaraq, hədiyyələrin və müxtəlif nemətlərin satış yarmarkaları keçirilir, el şənlikləri təşkil olunur…
Novruzun əsas adətlərindən biri bayram süfrəsində adları “s” hərfi ilə başlayan yeddi nemətin olmasıdır ki, bunların da hər biri insan üçün vacib sayılan şeyləri: həyatı, sağlamlığı, gücü, müdrikliyi, uzunömürlülüyü, firavanlığı, sevinci rəmzləşdirir. Bu adətin mənası çox dərindir, sanki gələcək firavanlığın və rifahın təməli qoyulur.
Bayrama hazırlıq isə cərşənbələrlə başlayır: onlardan üçü – su, od, yel çərşənbələri artıq geridə qalıb, qarşıdan növbəti – torpaq çərşənbəsi gəlir. Bayram şənlikləri, rəqslər, mahnılar və milli oyunlar şəhər və kəndlərimizə sevinc və əyləncə mühiti yaradır. Novruz insanların gündəlik qayğıları unutduğu, sevdikləri ilə ünsiyyətdən həzz aldıqları bir vaxtdır.
Beləliklə, Azərbaycanda Novruz sadəcə bayram deyil, insanların görüşməsi, sevinclərini bölüşməsi, bir-birinə xoşbəxtlik, sağlamlıq və firavanlıq arzulaması üçün fürsətdir.
Bayramınız mübarək!
Azər Əsgərov
Əziz qadınlar! Sizi ən gözəl və zərif bayram – 8 Mart Beynəlxalq Qadınlar Günü münasibətilə təbrik edirəm!
Qadınlar Gününü bir bayram kimi qeyd etmək ənənəsinin necə yarandığı barədə müxtəlif versiyalar var. Əslində, bu barədə deyilənlər məni maraqlandırmır. Ancaq nə yaxşı ki, bu bayram var, nə yaxşı ki, onu düşünüb tapıblar və nə yaxşı ki, bütün dünyada sevgi və sevinclə qeyd edirlər. Bunun da səbəbi məlumdur: diqqət mərkəzində, yaşından və sosial statusundan asılı olmayaraq, cazibədar, həssas, gözəl, mehriban, mülayim, cazibədar, gözəl QADIN dayanır.
Əziz qadınlar, siz bizim ilham mənbəyimiz, ailə ocağımız və rahatlığımız, xoşbəxtliyimiz və arxa-dayağımısınız!
Sizin xeyirxah qəlbiniz dünyaya işıq və sevinc bəxş edir. Sədaqətinizə, qayğınıza və sevginizə görə sizə minnətdarıq. Nənələr, analar, həyat yoldaşları, bacılar, qızlar və nəvələr – hər biriniz bizim üçün əvəzsiz və çox dəyərlisiniz. Siz həyatımızı gözəlləşdirir və mənalandırırsınız, ocağımızın hərarətini, xalqımızın əsrlərdən bəri davam edən adət-ənənələrini qoruyursunuz.
Qoy 8 Mart Qadınlar Günü Sizin üçün xoş təəssüratlar və sürprizlərlə dolu olsun, gözlərinizdən sevinc, üzünüzdən təbəssüm heç vaxt əskilməsin!
Sizə cansağlığı, xoş əhval-ruhiyyə, səadət arzulayıram!
Azər Əsgərov
Fevralın 26-da biz 1992-ci ildə Xocalıda baş vermiş qanlı faciə qurbanlarının xatirəsini ehtiramla yad edirik. Bu dəhşətli hadisədən uzun illər keçib. Amma Qarabağın kiçik bir şəhərinin sakinlərinə qarşı törədilmiş amansız cinayəti unutmaq mümkünsüzdür. Dinc əhaliyə qarşı soyqırımı erməni quldur dəstələri tərəfindən, keçmiş SSRİ Silahlı Qüvvələrinin, əsasən, ermənilərdən ibarət olan 366-cı motoatıcı alayının dəstəyi ilə həyata keçirilib. Həmin gün təkcə Azərbaycan xalqının deyil, bütün bəşəriyyətin yaddaşında qeyri-insani zorakılığın, terrorun, dəhşətli soyqırımın rəmzi kimi əbədi qalacaqdır.
Xocalı Qarabağda azərbaycanlıların yaşadığı əsrarəngiz, dinc bir şəhər idi. Lakin buradakı dinc həyatı erməni separatçılar qəsdən məhv etdilər. Müdafiəsiz qadınları, uşaqları və qocaları erməni quldur dəstələri və 366-cı alayın əsgərləri amansızcasına güllələdilər.
Qətliam qurbanlarının statistikası ermənilərin bölgənin azərbaycanlı əhalisinə qarşı qeyri-insani rəftarından xəbər verir. Xocalı soyqırımı zamanı 613 nəfər qətlə yetirilib; onlardan 106-sı qadın, 63-ü azyaşlı uşaq, 70-i qocalardır. 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. 1000 nəfər əlil olub. 1275 dinc sakin əsir götürülüb, onlardan 150-nin taleyi hələ də məlum deyil.
Qatilləri unutmayacağıq və bağışlamayacağıq!
Bu gün biz soyqırımı qurbanlarının xatirəsini Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun işğal altındakı bütün torpaqları, o cümlədən Xocalını azad etdiyi bir şəraitdə ehtiramla yad edirik. Düşmən üzərində Qələbəmiz, bütün Qarabağın şəhər və kəndlərində ucalan Azərbaycan bayrağı ötən illərin iztirablarına, itkilərinə cavabımız, Xocalı soyqırımının günahsız qurbanlarının hər birinə görə alınan qisasın rəmzidir.
Xocalının xatirəsi bizə həmişə sülh və ədalət uğrunda mübarizə aparmağın zəruriliyini xatırladacaq. Və belə dəhşətli hadisələrin bir daha təkrarlanmaması üçün biz o illərin dərslərini unutmamalı və düzgün nəticə çıxarmalıyıq.
32 il əvvəl doğma yurdunu tərk etmək məcburiyyətində qalan Xocalı sakinləri bu il yeni tikilən evlərdə öz ata-baba ocaqlarına qayıtmağa başlayacaqlar. Həyat öz adi dinc axarına qayıdacaq, illər, onilliklər keçəcək… Bəli, yaşamalıyıq…
Amma soyqırımını unutmamalıyıq ki, bu, bir daha təkrarlanmasın.
Xocalı ağrısı əbədi olaraq qəlbimizdədir.
Azər Əsgərov
Bizim, Azərbaycan vətəndaşlarının növbəti 7 il müddətinə ölkə Prezidenti seçdiyimiz gün – 2024-cü il fevralın 7-si təhlükəsizlik və sabitlik, inkişaf və tərəqqi naminə ümumxalq səsverməsi günü kimi tarixə düşəcək. Və biz İlham Əliyevə səsimizi verərkən əmin idik ki, ölkəmizin daha da güclənməsinə və çiçəklənməsinə, bəzi ölkələrin ikili standartlar siyasəti ilə üzləşdiyimiz bir şəraitdə cəsarətli liderlik nümunəsi göstərən rəhbərə səs veririk.
Seçki günü ictimai-siyasi həyatımızda əlamətdar hadisəyə çevrildi. Bu, dövlətimizin fəaliyyətdə olan başçısının əsl zəfər günü idi. Şəxsən mən əvvəllər seçki günündə səs verməyə bu qədər insanın – seçicinin gəldiyini görməmişdim. Etiraf edim ki, yüksək əhval-ruhiyyə ilə seçki məntəqəsinə gedərkən gördüyüm mənzərədən xalqımıza, onun rəhbərinə, ölkəmizə görə qürur hissi keçirdim.
Ən xoş və heyrətamiz hal isə səsvermənin ilkin nəticələrinin açıqlanmasından sonra xalqın, sözün əsl mənasında, küçələrə axışması oldu. Gecə Azərbaycanın hər yerində əsl ümumxalq şənliyi vardı: Bakının, Gəncənin, Şuşanın və digər şəhərlərimizin küçələrində bayraqlarla bəzədilmiş avtomobillərin siqnal səsləri ətrafa yayılır, hər tərəfdə musiqi sədaları ucalır, adamlar rəqs edirdilər.
Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevə hörmət və minnətdarlıq əlaməti olaraq xalq öz sevgisini belə ifadə edir, onun seçkilərdə qələbəsinə ürəkdən sevinirdi.
Bu cür ümumxalq sevincini gördüyüm üç hadisə yadımdadır: 2016-cı ilin aprelində 4 gün ərzində erməni işğalçı ordusunun məğlubedilməzliyi mifinin darmadağın edilərək ərazilərimizin bir hissəsinin azad olunmasından; 2020-ci ildə 44 günlük müharibədə möhtəşəm Zəfərin qazanılmasından və Azərbaycanın bütün işğal olunmuş ərazilərinin erməni təcavüzkarlarından tam azad edilməsindən, bir də bu il fevralın 7-də axşam seçkilərin ilkin nəticələrinin açıqlanmasından sonra…
Fevralın 7-də keçirilən seçkilərdə İlham Əliyevə ümumxalq dəstəyinin verilməsi onun Azərbaycanın bütün sahələrdə müasir nailiyyətlərə yol açan müdrik siyasətinə, strateji proqram və layihələrinə böyük inamımızın, minnətdarlığımızın və sonsuz etibarımızın sübutudur.
Ölkəmizdə və bütün dünyada hər kəs bilir ki, son illərdə Azərbaycan necə dəyişib. Ulu Öndər Heydər Əliyevin müəyyənləşdirdiyi inkişaf kursunu davam etdirən İlham Əliyev dövlətçiliyin əsaslarının möhkəmləndirilməsinə, iqtisadiyyatın çoxsaylı sahələrinin müasirləşməsinə imkan verən dəyişikliklər və islahatlar həyata keçirib. Bu illər ərzində onun fədakarlığı, qətiyyəti, yüksək siyasi mədəniyyəti və xalqın səsini eşitmək bacarığı sayəsində böyük siyasət və iqtisadiyyat aləmində nüfuz sahibi olan güclü dövlət qurulub. İlham Əliyevin Azərbaycan xalqının hərtərəfli dəstəyini qazanmış, Vətənin təhlükəsizliyinin və sabit inkişafının təmin edilməsinə yönəlmiş prinsipial və müstəqil siyasi qərarlarını, ölkənin ərazi bütövlüyünün müdafiəsi ilə bağlı güzəştsiz mövqeyini xüsusilə qeyd etmək istərdim. Hazırkı seçkilərdə verdiyimiz səslər bir daha bariz şəkildə sübut edir ki, biz hamımız Azərbaycan Prezidenti cənab İlham Əliyevlə çiyin-çiyinəyik və onunla hər cür sınaqdan çıxmağa hazırıq.
Növbədənkənar prezident seçkilərində inamlı qələbəsi münasibətilə dünyanın müxtəlif ölkələrindən, dövlət başçıları və beynəlxalq təşkilatların rəhbərləri tərəfindən İlham Əliyevə ünvanlanan təbriklərdə onun yüksək siyasi nüfuzu Azərbaycanın davamlı sosial-iqtisadi inkişaf xəttinə xalq dəstəyi səmimi şəkildə etiraf olunur, Prezidentimizə xoş arzular bildirilir…
Mən 2024-cü il fevralın 7-ni xalqın öz liderinə – Prezident İlham Əliyevə inamının təntənəsi və minnətdarlığı günü hesab edirəm!
Azər Əsgərov
Fevralın 7-də keçiriləcək növbədənkənar prezident seçkiləri ölkəmizin həyatında çox mühüm tarixi hadisə olacaq. Biz bu seçkilərə qalib xalq, qalib dövlət kimi gedirik. Torpaqlarımız işğaldan azad edilib, Qarabağda dövlətimizin suverenliyi tam təmin olunub. Bizi qələbələrə çatdıran Ulu Öndər Heydər Əliyev yoludur. Son iyirmi ildə möhtərəm Prezident, Müzəffər Ali Baş Komandan İlham Əliyevin rəhbərliyi ilə bu işıqlı yol ilə addımlayan Azərbaycan çox böyük uğurlar qazanıb.
Mən və mənim kimi milyonlarla vətəndaş ölkəmiz və xalqımız üçün xeyirli-uğurlu olan bu yolun davam etdirilməsinə səs vermişik. 2003-cü ildə belə olub, prezident seçkilərin keçirildiyi sonrakı illərdə də…
2023-cü il fevralın 7-də biz yenidən öz doğru seçimimizi bir daha təsdiq edəcəyik.
Əlbəttə, bu seçim üçün əlimizdə tutarlı əsasımız var: xalqın birliyini və həmrəyliyini təmin edən, dövlətimizi siyasi, iqtisadi, hərbi cəhətdən gücləndirən və 30 ilə yaxın müddətdə Azərbaycanın hər bir vcidanlı, vətənpərvər vətəndaşının qəlbində, həyatında ağır bir yükə çevrilən Qarabağ probleminin həllinə nail olaraq bizə qürur, mənəvi ucalıq hissi, qələbə sevinci qazandıran Liderə səs verəcəyik.
Bizim Liderimiz İlham Heydər oğlu Əliyevdir!
Azərbaycanımızı sevən, onun inkişafı üçün çalışan, xalqımızın daim qələbə ruhu ilə yaşamasını istəyən hər bir seçicini seçkilərdə fəal iştirak etməyə və cənab İlham Əliyevə səs verməyə çağırıam!
Azər Əsgərov
1990-cı il yanvarın 19-dan 20-nə keçən gecə Azərbaycanda baş vermiş faciəli hadisələrdən – XX əsrin sonlarında xalqımızın tarixi taleyini yeni bir məcraya yönəltmiş faciədən 34 il keçir. Xalq arasında və mətbuat səhifələrində 20 yanvar faciəsi adlandırılan həmin hadisələr, aradan onilliklər keçməsinə baxmayaraq, unudulmur, dinc əhalinin vəhşicəsinə qətlə yetirilməsi, əvvəlki kimi, kədər, nifrət və qəzəb hissi doğurur. Eyni zamanda, həmvətənlərimizin qəhrəmanlığından qürur duyuruq. Onlar canları, qanları bahasına öz vətəndaş ləyaqətlərini və ölkəmizin azad, müstəqil olmaq hüququnu müdafiə etdilər. Məhz 1990-cı il yanvarın 20-si Azərbaycanı suverenliyə aparan yolun başlanğıcı oldu.
Həmin kədərli hadisələrin növbəti ildönümünü ölkəmiz Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun mərdliyi və rəşadəti sayəsində öz ərazi bütövlüyünü və suverenliyini tam bərpa etdiyi bir şəraitdə qarşılayır.
Bu gün biz ölkəmizin qarşısında yarana biləcək istənilən çağırış və risklərə tab gətirəcək siyasi institutların və hökumət strukturlarının gücləndirilməsi istiqamətində səylərimizi birləşdirməliyik. Yalnız xalqımızın birliyi və həmrəyliyi ilə hər hansı xarici təhlükə və fəlakətlərdən uzaq, firavan gələcək qura bilərik.
1990-cı ilin 20 Yanvarında şəhid olanların xatirəsi qəlbimizdə daim yaşayacaq, onların qəhrəmanlığı bizi daim quruculuq işlərinə, xüsusən də bu gün ölkənin inkişafı üçün zəruri olan işlərə ruhlandıracaqdır.
Azər Əsgərov
Əziz dostlar!
Yeni İliniz və Dünya Azərbaycanlıların Həmrəyliyi Gününüz mübarək olsun! Qoy bu günlərin sevinci, coşqusu və uğurları tükənməz olsun!
2023-cü il – tarixi hadisə və çağırışılarla, əzmkar fəaliyyət və qələbələrlə dolu bir il sona çatır. Yola saldığımız 2023-cü il ölkəmizin tarixinə, ilk növbədə, sentyabrın 19-da yüksək dəqiqlikli silahların tətbiqi ilə həyata keçirilən lokal antiterror tədbirləri nəticəsində Azərbaycanın dövlət suverenliyinin tam bərpa olunduğu il kimi düşəcək.
Rəşadətli Ordumuz 2020-ci il 10 noyabr tarixli Bəyannamənin imzalanmasından sonra Qarabağda qalan erməni silahlı birləşmələrinin, təxminən, 15 minlik kontingentini 24 saatdan da az müddətdə təslim olmağa məcbur etdi. Ermənistan separatizmi qızışdıran və şirnikləndirən hərəkətləri ilə üzərinə götürdüyü beynəlxalq öhdəlikləri və razılaşmaları əngəlləməyə cəhd göstərirdi. Bununla belə, Prezident İlham Əliyevin Azərbaycanın dövlət suverenliyi və beynəlxalq hüquq çərçivəsində öz ərazisinə tam nəzarət etmək haqqına əsaslanan dəqiq, mükəmməl və qətiyyətli siyasəti nəticəsini verdi. Məhz buna görə də 2023-cü il ölkəmiz üçün daha bir uğur və zəfər ilidir. Bu gün minlərlə keçmiş məcburi köçkün Qarabağda yaşayır, onların evləri dövlətimiz tərəfindən sürətlə bərpa olunur və bu proses geniş vüsət alır.
Mən bir iş adamı kimi həm işğaldan azad edilmiş ərazilərdə, həm də ölkəmizdə həyata keçirilən qlobal layihələrə qürur duyuram. Bu, Azərbaycanın gücünün, qüdrətinin sübutudur. Mən əldə olunan nailiyyətlərlə fəxr edirəm və bir daha anlayıram ki, əsas məsələ təkcə uğur qazanmaqda deyil, həm də görülən işlərin əhəmiyyətindədir. Yeni ildə hamımıza uğurlu işlər, ruhlandırıcı ideyalar və xeyirli layihələr arzulayıram.
Bir cüdoçu kimi çoxdan başa düşürəm ki, həyatda iradə, dözümlülük, səbr və yıxıldıqdan sonra ayağa qalxmaq kimi keyfiyyətlər uğur qazanmaq üçün çox vacibdir. Qoy, qarşıdakı il sizə yalnız yüksək mübarizə ruhu, arzu və istəklərinizə qovuşmaq səadəti nəsib etsin.
Dostlar, Dünya Azərbaycanlılarının Həmrəyliyi Günü bizə birliyin və bir-birimizə dəstək olmağın vacibliyini xatırladır. Yeni ildə daha da yaxın olaq, daha da güclü olaq və bütün çətinlikləri birlikdə dəf etməyə hazır olaq. Qoy, 2024-cü ildə yollarımız parlaq hadisələrlə və yeni imkanlarla dolu olsun.
Yeni İliniz mübarək!
Azər Əsgərov
Bu gün, bizim üçün xüsusi əhəmiyyət kəsb edən ildə müdriklik, qüdrət və siyasi ustadlıq rəmzinə çevrilmiş Dahi Şəxsiyyət, Azərbaycan xalqının Ümummilli Lideri Heydər Əliyevin xatirəsini böyük ehtiramla yad edirik.
Biz xalqı xilas etməyi, tərəqqiyə çatdırmağı, onun inkişafına töhfə verməyi bacaran, müdrik və uzaqgörən siyasəti ilə Azərbaycanı dünya miqyasında güclü, hörmətli dövlətə çevirən bu İnsana ehtiramımızı bildiririk.
Heydər Əliyev müasir Azərbaycan dövlətinin memarıdır, onun müdrik siyasəti ölkəyə ən çətin vəziyyətlərdən çıxarmaq imkan verib. Azərbaycanın dünyəvi, dayanıqlı dövlətə çevrilməsində bir lider kimi onun qərarları və islahatları əsas rol oynayıb. Onun rəhbərliyi ilə siyasi, iqtisadi və sosial sahələrdə mühüm dəyişikliklər həyata keçirilib. Heydər Əliyev ölkəni sabitliyə qovuşdurdu, milli iqtisadiyyatı bərpa etdi, Silahlı Qüvvələri dirçəldi, dünya miqyasında mövqelərimizi möhkəmləndirə bildi. Özünün strateji baxışları ilə güclü və firavan dövlətin əsaslarını yaratdı. İqtisadiyyatda islahatlar apardı, təhsil, elm və mədəniyyəti inkişaf etdirdi və nəticədə, Azərbaycanı regionun liderlərindən birinə çevirdi. Heydər Əliyevin milləti ümumi məqsəd və prinsiplər ətrafında birləşdirə bilməsi vahid və güclü dövlətin yaradılmasına əvəzsiz töhfə oldu.
Bu gün bizim hər birimiz onun irsini yaşadırıq. Biz Heydər Əliyevin əsasını qoyduğu dəyərlərə – müdrikliyə, zəhmətkeşliyə, vətənpərvərliyə arxalanaraq gələcəyi qurmağa davam edirik. Ölkəmizin inkişafında əvəzsiz xidmətlərinə görə ona minnətdarıq. Bu gün biz təkcə kədər deyil, həm də onun bizim üçün etdiyi hər şeyə görə minnətdarlıq hissi keçiririk.
Xatirəsi əbədidir, nəsihətləri gələcəyimizin işıqlandırır. Heydər Əliyev bizim qəlbimizdə və gələcək nəsillər naminə gördüyümüz bütün işlərdə yaşayır.
Azər Əsgərov
Əziz həmvətənlər!
Dünən Zəfər bayramını qeyd etdik. Bu gün isə Dövlət Bayrağı Gününüdür.
Möhtərəm Prezident, Müzəffər Ali Baş Komandan cənab İlham Əliyev dünən Qarabağda, Xankəndi şəhərində Vətən müharibəsində möhtəşəm Zəfərimizin 3-cü ildönümünə həsr olunmuş hərbi paradı qəbul etdi. Silahlı Qüvvələrimizin rəşadətli hərbçilərinin qürurlu, mətin addımlarının sədası Xankəndidən bütün dünyaya yayıldı. Bu anlarda bizim – hər bir azərbaycanlının qəlbi hədsiz fərəh hissi ilə döyünürdü.
Yaşasın, Zəfərimiz! Yaşasın, qələbələrimizin memarı Müzəffər Ali Baş Komandan!
Torpaqlarımızın azadlığı, dövlət suverenliyimizin bərpası uğrunda canından keçən şəhidlərimizə Allahdan rəhmət, qazilərimizə şəfa, Vətənimizin və Bayrağımızın keşiyində dayanan əsgər və zabitlərimizə möhkəm cansağlığı arzulayıram!
Bayraq millətimizin, dövlətimizin şərəf və ləyaqətinin ifadəsi, həm də şəhidlərimizin, Vətən uğrunda gözünü qırpmadan canından keçənlərin nişanəsidir.
Bu gün bütün ərazilərimizdə üçrəngli bayrağımız dalğalanır. Artıq üçüncü ildir ki, Dövlət Bayrağı Günü işğaldan azad edilən Azərbaycan torpaqlarında da qeyd olunur.
Hər zaman yüksəklərdə dalğalan, Azərbaycan Bayrağı!
Azər Əsgərov
